«سئوگی»

 

دولدورگیلان پئیماننی،

جان شرابین ایچیم سئوگی.

عشق ادوندان یانیر کونول،

آلولیدی ایچیم سئوگی.

 

دان اولدوزوم ایشیق ساغدی،

یانقی یئره یاغیش یاغدی،

قارشیم دره آردیم داغدی،

توت الیمدن کئچیم سئوگی.

 

جان سئوگیسی بویاق اولماز،

مجنون اولان اویاق اولماز،

نامرد عشقه دایلاق اولماز،

دئ داغلارا قاچیم سئوگی.

 

تئللریوی داریارام،

قول بوینووا ساریارام،

منده یاردان یاریارام،

منی ائدسن سئچیم سئوگی.